पिंपरी-चिंचवडमध्ये ‘वुमन्स हॉकी स्पर्धा’ दोन गटांत रंगणार; १२ ते २३ ऑगस्टदरम्यान नेहरूनगरच्या स्टेडियमवर खेळाचा थरार

पिंपरीचिंचवड,१७ऑगस्ट२०२६(लोकजागृती न्यूज):

पिंपरी-चिंचवड शहरात महिला क्रीडा संस्कृतीला अधिक प्रोत्साहन देण्यासाठी आणि महिला हॉकीपटूंना राष्ट्रीय स्तरावर आपले क्रीडाकौशल्य दाखविण्याची सुवर्णसंधी उपलब्ध करून देण्यासाठी पिंपरी-चिंचवड महानगरपालिकेच्या वतीने विशेष वुमन्स हॉकी स्पर्धा २०२६’ चे आयोजन करण्यात आले आहे. ही प्रतिष्ठेची स्पर्धा आगामी १२ ते २३ ऑगस्ट २०२६ या कालावधीत नेहरूनगर, पिंपरी येथील मेजर ध्यानचंद हॉकी पॉलिग्रास स्टेडियम येथे मोठ्या उत्साहात पार पडणार आहे.शहरातील आणि परिसरातील महिला खेळाडूंना अधिक स्पर्धात्मक अनुभव मिळावा यासाठी ही स्पर्धा दोन वेगवेगळ्या गटांमध्ये खेळवली जाणार आहे. विविध वयोगट आणि नैपुण्याचा स्तर लक्षात घेऊन आयोजित करण्यात आलेल्या या दोन गटांमुळे स्पर्धेतील चुरस अधिक वाढणार असून, प्रेक्षकांना अटीतटीचे व रोमांचक सामने पाहायला मिळणार आहे.

पिंपरी-चिंचवड शहर हे नेहमीच उत्कृष्ट खेळाडू घडवणारे हब म्हणून ओळखले जाते. शालेय व महाविद्यालयीन तरुणींमध्ये हॉकी खेळाची आवड निर्माण व्हावी, त्यांना व्यावसायिक स्पर्धेचा प्रत्यक्ष अनुभव मिळावा आणि त्यांच्या क्रीडागुणांना योग्य वाव मिळवून दिला जावा, हा या स्पर्धेमागील मुख्य उद्देश आहे. या स्पर्धेत अनेक संघ सहभाग घेत असून, खेळाडूंची जय्यत तयारी सुरू आहे.

महापालिकेच्या क्रीडा विभागाच्या वतीने या स्पर्धेच्या यशस्वी आयोजनासाठी सर्व तयारी पूर्ण करण्यात आली आहे. शहरातील तमाम क्रीडाप्रेमी नागरिकांनी मोठ्या संख्येने उपस्थित राहून महिला खेळाडूंचा उत्साह वाढवावा आणि या रोमांचक हॉकी सामन्यांचा आनंद घ्यावा, असे आवाहन महानगरपालिकेच्या वतीने करण्यात आले आहे.