रवि लांडगे यांच्या नेतृत्वाखाली ५७ हजार विद्यार्थ्यांची शालेय पोषण आहार व्यवस्था अधिक सक्षम

पिंपरी-चिंचवड, १२ सप्टेंबर २०२६ (लोकजागृती न्यूज):

विद्यार्थ्यांचे आरोग्य, उत्तम पोषण आणि गुणवत्तापूर्ण शिक्षण यांना सर्वोच्च प्राधान्य देत, पिंपरी-चिंचवड महानगरपालिका आणि अन्नामृत फाउंडेशन यांच्या संयुक्त विद्यमाने नूतनीकरण व आधुनिकीकरण करण्यात आलेल्या शालेय पोषण आहाराच्या केंद्रीय स्वयंपाकगृहाचे आज दिमाखात उद्घाटन करण्यात आले. या अद्ययावत सुविधेमुळे महानगरपालिका क्षेत्रातील सुमारे ३०० शाळांमधील तब्बल ५७ हजार विद्यार्थ्यांसाठी** राबविण्यात येणारी शालेय पोषण आहार व्यवस्था अधिक सक्षम आणि आधुनिक झाली आहे.

अन्नामृत फाउंडेशनच्या माध्यमातून महानगरपालिकेच्या शाळांमधील विद्यार्थ्यांना नियमितपणे शालेय पोषण आहार पुरविण्यात येतो. विद्यार्थ्यांना दिल्या जाणाऱ्या आहाराची गुणवत्ता, स्वच्छता, सुरक्षितता आणि पोषणमूल्ये यांचा काटेकोर विचार करून हे केंद्रीय स्वयंपाकगृह अत्याधुनिक तंत्रज्ञानाच्या सहाय्याने सज्ज करण्यात आले आहे. आहार तयार करण्यापासून ते थेट विद्यार्थ्यांपर्यंत पोहोचविण्याच्या संपूर्ण प्रक्रियेमध्ये अन्नसुरक्षेच्या निकषांचे चोख पालन करण्यावर भर देण्यात आला आहे.

या उद्घाटन प्रसंगी बोलताना महापौर रवि लांडगेम्हणाले की,“विद्यार्थ्यांचे आरोग्य, पोषण आणि शिक्षण यांचा परस्परांशी अतिशय जवळचा संबंध आहे. विद्यार्थ्यांना गुणवत्तापूर्ण शिक्षणासोबतच स्वच्छ, सकस आणि पौष्टिक आहार मिळणे ही आपली महत्त्वाची जबाबदारी आहे. पिंपरी-चिंचवडमधील सुमारे ५७ हजार विद्यार्थ्यांना नियमितपणे पोषण आहार उपलब्ध करून दिला जात असून, या व्यवस्थेमध्ये स्वच्छता आणि गुणवत्तेचा उच्च दर्जा कायम राखणे आवश्यक आहे. आधुनिक पद्धतीने अद्ययावत करण्यात आलेले हे केंद्रीय स्वयंपाकगृह त्यादृष्टीने अत्यंत महत्त्वपूर्ण ठरेल.” विद्यार्थ्यांच्या शारीरिक व बौद्धिक विकासासाठी योग्य पोषण आवश्यक असल्याचे सांगत, भविष्यातही अशा विद्यार्थीकेंद्री उपक्रमांना महापालिकेच्या माध्यमातून पूर्ण प्राधान्य दिले जाईल, असा विश्वास त्यांनी व्यक्त केला.

आमदार श्रीकांत भारतीय यांचे विशेष सहकार्यया अद्ययावत केंद्रीय स्वयंपाकगृहासाठी आवश्यक जागा उपलब्ध करून देण्याच्या दृष्टीने मार्गदर्शक तथा आमदार श्रीकांत भारतीय यांचे मोलाचे व विशेष सहकार्य लाभले. त्यांच्याच सहकार्यामुळे विद्यार्थ्यांच्या शालेय पोषण आहारासाठी ही अत्याधुनिक व अधिक सक्षम व्यवस्था उभारणे शक्य झाले.

या सोहळ्याला महाराष्ट्र राज्याचे उच्च व तंत्रशिक्षण मंत्री चंद्रकांत पाटील इस्कॉनचे आध्यात्मिक गुरु गौरांग प्रभू, आमदार  श्रीकांत भारतीय, आमदार अमित गोरखे, भाजप प्रदेश सरचिटणीस राजेश पांडे, नगरसेविका **सारिका मासुळकर** यांच्यासह अन्नामृत फाउंडेशनचे पदाधिकारी, महापालिकेचे अधिकारी, कर्मचारी आणि विविध क्षेत्रांतील अनेक मान्यवर मोठ्या संख्येने उपस्थित होते.

भविष्यातील उज्ज्वल भविष्यासाठी बळशालेय पोषण आहार हा विशेषतः आर्थिकदृष्ट्या गरजू कुटुंबांतील विद्यार्थ्यांच्या आरोग्याच्या दृष्टीने अत्यंत महत्त्वाचा घटक आहे. या अद्ययावत केंद्रीय स्वयंपाकगृहामुळे मोठ्या प्रमाणावर पौष्टिक आहार तयार करण्याची क्षमता वाढली असून, स्वच्छता व अन्नसुरक्षेचे व्यवस्थापन अधिक बळकट झाले आहे. परिणामी, पिंपरी-चिंचवडमधील हजारो विद्यार्थ्यांच्या आरोग्यपूर्ण व उज्ज्वल भविष्यासाठी सुरू असलेल्या प्रयत्नांना या उपक्रमामुळे एक नवी दिशा व बळ मिळाले आहे.